Ákærum í efnahagsbrotum fjölgar verulega

Ákærum hjá efnahagsbrotadeild ríkislögreglustjóra hefur fjölgað verulega á milli ára eða úr 21 ákæru á árinu 2007 í 62 ákærur á árinu 2010. Árið 2008 voru gefnar út 42 ákærur og 47 á árinu 2009. Á þessum fjórum árum eru útgefnar ákærur 172 talsins.

„Um áramótin 2009-2010 voru 133 mál í rannsókn hjá efnahagsbrotadeild,“ segir í tilkynningu frá saksóknara efnhagsbrota hjá embætti ríkislögreglustjóra. „Á árinu 2010 voru málin flest 139 og var rík áhersla lögð á að ljúka málum innan þeirra tímamarka sem mælt er fyrir um í málsmeðferðarreglum ríkissaksóknara.“

Tólf mál varða ætluð gjaldeyrishaftabrot

Þá segir að ýmsar skipulagsbreytingar hafi verið gerðar á starfsemi deildarinnar til að bregðast við þessum fjölda mála. „Um síðustu áramót voru 57 mál til meðferðar í deildinni. Af 57 málum sem eru nú til rannsóknar í efnahagsbrotadeild ríkislögreglustjóra eru 12 mál vegna ætlaðra brota á gjaldeyrishöftum. Mörg þeirra mála eru umfangsmikil og flókin og teygja anga sína til annarra landa.“