Símastarfsmaður er grunaður um hlerun

Póst- og fjarskiptastofnun hefur nú til rannsóknar mál sem varðar meinta símhlerun starfsmanns símafyrirtækis. Þetta staðfestir Hrafnkell Gíslason, forstjóri PFS, við Fréttablaðið. Hann segir þetta mál það fyrsta sinnar tegundar sem stofnunin hafi fengið til athugunar. Því sé ekki lokið en muni ljúka í þessum mánuði.

Eftir því sem Fréttablaðið kemst næst sakar fyrrverandi maki starfsmannsins hann um að hafa hlerað síma sinn. Blátt bann er lagt við slíku í fjarskiptalögum og ríkar skyldur lagðar á símafyrirtækin að tryggja leynd fjarskipta.

Ekkert utanaðkomandi eftirlit er með framkvæmd símhlerana í þágu rannsókna lögreglu. Póst- og fjarskiptastofnun hefur sett almennar reglur um framkvæmdina en sinnir ekki reglulegu eftirliti. Lítil hópur tæknimanna, sem stjórnendur fyrirtækjanna vita ekki hverjir eru, tengir þau símanúmer sem vilji er til að hlera við lögregluna að undangengnum dómsúrskurði. Engin skipulögð leit fer fram innan fyrirtækjanna að sporum sem hleranir skilja eftir sig. Þetta kemur fram í svörum Símans, Vodafone, Nova og Tals við fyrirspurn Fréttablaðsins um málið.

Ásgeir Karlsson, yfirmaður greiningardeildar Ríkislögreglustjóra, bendir á að lögreglan skoði ekki bakgrunn þeirra starfsmanna sem komi að tengingu vegna símhlerana hjá fjarskiptafyrirtækjunum. Úr því þurfi að bæta.

Ögmundur Jónasson innanríkisráðherra segir að þarna sé um að ræða brotalöm í kerfinu til verndar réttindum borgaranna, sem verði að laga. -jss, þsj