Vinkonur leggja 353 milljónir í sundlaug

Samkvæmt upplýsingum frá Margeiri Friðrikssyni, sviðsstjóra stjórnsýslu- og fjármálasviðs Skagafjarðar, nemur heildarfjárhæð gjafar Lilju og Steinunnar 353 milljónum króna. Það segir Margeir vera einstakt.

Óvissa hefur hins vegar verið með lokauppgjör vegna tæplega 41 milljónar króna sem stendur út af, að mestu vegna verðbóta á verktímanum og búnaðar sem sveitarfélagið sjálft vildi bæta við sundlaugina.

Guðmundi Guðlaugssyni, fyrrverandi sveitarstjóra, var falið að ganga frá samkomulagi við Lilju og Steinunni. Í greinargerð Guðmundur með tillögu að lokauppgjöri kemur fram að við verklok hafi ekki verið augljóst hvernig túlka bæri einstök atriði samnings frá því í júní 2007 um gjafagjörninginn. Eins hafi í veigamiklum atriðum ekki verið farið eftir umsömdu fyrirkomulagi.

"Sú staða gerir það að verkum að erfitt er að segja til um nákvæmlega hver hámarksfjárhæð gjafar á að vera samkvæmt samkomulaginu og þar með greiðslu allra eftirstöðva kostnaðar og með því klára verkið. Þegar nálgaðist verklok tók sveitarfélagið yfir greiðslu alls kostnaðar við að ljúka framkvæmd, að frágengnu samkomulagi við gefendur þar um í ljósi ofangreindrar óvissu. Hefur því safnast upp verkkostnaður hjá sveitafélaginu sem aðilar hafa átt viðræður um að undanförnu hvernig með skuli fara," útskýrir Guðmundur.

Lilja og Steinunn lýstu sig reiðubúnar að greiða 15 milljónir af fyrrnefndri 41 milljón. Þær vísuðu einnig í mat tæknilegs ráðgjafa sem taldi hönnunarkostnað of háan. Því segist Guðmundur ósammála en samkvæmt samkomlagi sem nú hefur náðst munu Lilja og Steinunn fá þá uppæð sem hugsanlega fellur til vegna lækkunar á hönnunarkostnaði. Þá mun sveitarfélagið greiða 16,8 milljónir króna en Lilja og Steinunn 21,1 milljón, takist að fá hönnunarkostnaðinn lækkaðan um 3 milljónir króna.

"Vil ég taka það skýrt fram að ekki má túlka það sem hér er fram sett að neinu leyti í þá veru að í felist vottur af vanþakklæti þegar horft er til hinnar höfðinglegu gjafar," segir Guðmundur Guðlaugsson í greinargerð sinnu um lyktir málsins.gar

@frettabladid.is