Nýtur hlutfallslega mests stuðnings meðal framsóknarmanna

Hanna Birna Kristjánsdóttir, oddviti Sjálfstæðisflokksins í borgarstjórn, nýtur hlutfallslega mests stuðnings á meðal kjósenda Framsóknarflokksins.

Eins og fréttastofa Stöðvar 2 og Vísis greindi frá í gær sýndi könnun sem Capacent gerði í byrjun júlí að Hanna Birna Kristjánsdóttir hefur langmest fylgi á meðal þeirra sem helst hafa verið nefndir sem formenn Sjálfstæðisflokksins. Kosið verður til formanns á landsfundi flokksins þriðju helgina i nóvember.

Það er athyglisvert að rýna í fylgistölur og bera þær saman við svör manna um það hvaða flokk svarendur segja að þeir myndu kjósa. Samkvæmt tölunum segjast 51% sjálfstæðismanna vilja sjá Hönnu Birnu sem formann. 59% þeirra sem segja að þeir myndu kjósa Framsóknarflokkinn segjast helst vilja sjá Hönnu Birnu sem næsta formann Sjálfstæðisflokksins, 29% þeirra sem segjast myndu kjósa Samfylkinguna og 24% þeirra sem segjast myndu kjósa VG.