Langafi Elvisar skilur ekkert í nafngiftinni

„Íslendingum er að fjölga og nafngiftum fjölgar líka,“ segir Ólafur Daði Helgason, faðir Theodórs Elvisar sem fæddist í desember á síðasta ári. Mannanafnanefnd samþykkti nýlega seinna nafn Theodórs eftir talsvert mas og þras að sögn föðurins.

Theodór Elvis var skírður 29. janúar og Ólafur Daði segir viðbrögð fjölskyldunnar við nafninu hafa verið góð. „Við héldum þessu leyndu. Viðbrögðin í kirkjunni voru ekki einu sinni blendin. Það fannst þetta öllum flott,“ segir hann. „Það var reyndar einn í fjölskyldunni sem var ekki alveg að skilja þetta. Það var afi minn, dr. Ólafur Halldórsson íslenskufræðingur. Hann er 93 ára og finnst að fólk eigi að heita einu nafni.“

Viðbrögðin í netheimum hafa verið blendin, en fréttir af nafninu bárust á mánudag. Ólafur segir notendur hins alræmda Barnalands hafa farið yfir strikið þegar þeir töldu drenginn gjalda fyrir aðdáun foreldranna á Elvis Presley. „Það er auðvitað sniðugt fólk á Barnalandi sem finnst þetta alveg út í hött,“ segir hann. „Hver einasta heilbrigða manneskja sér að þetta er ekki út í hött. Þetta er fallegt nafn. Við erum engin Elvis-frík. Það er ekki Elvis-altari hérna fyrir aftan. Ég er með mynd af Mick Jagger uppi á vegg, ekki Elvis. Þetta snýst ekki um það.“

Ólafur segist eiga plötur kóngsins og kannski einn eða tvo boli en ítrekar að nafnið sjálft sé málið. „Þetta er töff nafn og kannski aðeins til að heiðra rokkið og rólið í leiðinni,“ segir hann.

Þrátt fyrir að Ólafur og Olga Möller, unnusta hans, hafi unnið brautryðjendastarf með nafngiftinni vonar hann að verðandi foreldrar ofnoti nafnið ekki. „Það finnst engum klisjur fyndnar eða skemmtilegar,“ segir hann. „Vonandi verður það í hófi til að virða vinnu okkar til að fá nafnið í gegn.“ - afb