Þúsundir manna á Háskóladeginum

Haldið var upp á Háskóladaginn í dag og fjöldi fólks á öllum aldri nýtti tækfærið og kynnti sér starfsemi og námsframboð í íslenskum háskólum.

Háskólinn í Reykjavík tók á móti gestum í húsakynnum sínum við Nauthólsvík, en það er í fyrsta sinn sem HR heldur upp á Háskóladaginn á eigin spýtur og í eigin húsnæði . Jóhann Hlíðar Harðarson, forstöðumaður almannatengsla við HR, var að vonum ánægður með afrakstur dagsins og sagði daginn hafi gengið vonum framar og að aldrei áður hafi tekist eins vel til og nú. Þúsundir manna sóttu HR-inga heim og kynntu sér starfsemina og tóku þátt í ýmsum viðburðum á vegum starfsmanna og nemenda skólans.

Rannsóknarstofur skólans voru opnar gestum og gafst fólki tækifæri á að kynna sér rannsóknir sem fara fram við skólann og prófa alls kyns tól og tæki sem reyndist vera einn af vinsælli dagskrárliðum dagsins.

Hin árlega HR-áskorun vakti þá mikla lukku meðal gesta, en um er að ræða hönnunarkeppni sem er opin þeim sem ekki hafa lokið háskólanámi né stunda háskólanám. Að þessu sinni fólst áskorunin í því að hanna og smíða gosþjón til að hella gosi úr flösku á tilsettum tíma. Vélin átti að vera í anda teiknimyndahöfundarins Rube Goldberg, en dæmi um slíka vél má sjá á myndbandi frá hljómsveitinni OK Go. Það voru þeir Ásgeir Valfells úr MH og Hjörvar Logi Ingvarsson úr MR sem báru sigur úr býtum og hlutu þeir vegleg peningaverðlaun auk þess að fá niðurfelld skólagjöld á fyrstu önn, kjósi þeir að sækja nám við skólann.

Háskóli Íslands var með opið hús í eigin húsakynnum. Háskólinn á Bifröst tók á móti fólki í Norræna húsinu og í Ráðhúsi Reykjavíkur var opið hús á vegum Háskólans á Akureyri, Háskólans á Hólum, Landbúnaðarháskóla Íslands, Listaháskóla Íslands og norrænna háskóla.