Fátt kom á óvart í Emmy-tilnefningum

Emmy-tilnefningarnar árið 2011 voru gerðar opinberar fyrir skömmu og var fátt sem kom á óvart í þeim efnum. Sjónvarpsþættirnir Boardwalk Empire, Dexter, Friday Night Lights, Game of Thrones, Good Wife og Mad Men keppa um verðlaunin sem besti sjónvarpsþátturinn á meðan Big Bang Theory, Glee, Modern Family, The Office, Parks and Recreation og 30 Rock voru tilnefndir sem bestu gamanþættirnir.

Á meðal þeirra leikara sem tilnefndir voru sem bestu dramatísku leikararnir voru Steve Buscemi, Michael C. Hall, John Hamm og Hugh Laurie en íslenskir sjónvarpsáhorfendur ættu að þekkja þá flesta. Bestu dramatísku leikkonurnar voru meðal annars Mariska Harigtay, Julianna Margulies og Elisabeth Moss.

Í hópi bestu gamanleikaranna voru Alec Baldwin, Steve Carrell, Johnny Galecki og Jim Parsons, en þeir tveir síðastnefndu leika í The Big Bang Theory. Meðal bestu gamanleikkvenna voru Edie Falco, Tina Fey og Laurie Linney.