Reykjafoss fékk á sig högg

Reykjafoss, skip Eimskipafélags Íslands, fékk á sig högg rétt fyrir utan höfnina Argentia við Nýfundnaland í Kanada í morgun. Þetta kemur fram í tilkynningu frá félaginu.

Við höggið stöðvaðist vél skipsins og var það dregið stutta vegalengd að hafnarbakkanum. Skrúfa skipsins er löskuð en engin hætta er á ferð og ekki er vitað um annað tjón á skipinu að svo stöddu.

Sextán manna áhöfn er um borð í skipinu þar af þrír Íslendingar en engan sakaði. Farmur skipsins er heill en skipið var á leið frá Norfolk í Ameríku til Íslands þegar óhappið varð.