Þúsundir fengu vaxtaafslátt

Þúsundir skuldara fengu óvæntan glaðning í heimabankanum sínum í gær - þar var á ferð fyrsta greiðsla ríkissjóðs á vaxtaafslætti til þeirra sem skulda húsnæðislán.

Sjálfsagt hafa æði margir ekki verið með á nótunum þegar þeir ráku augun í innborgun á bankareikningi sínum í gær, greiðslu merkt ríkissjóði og ríkisféhirði. Skýringuna á þessum glaðningi, má rekja aftur til desember þegar ríkisstjórnin kynnti lokasvar sitt til að mæta skaðanum sem skuldug íslensk heimili höfðu orðið fyrir vegna hrunsins. Í þeim aðgerðapakka var kynnt ný tegund vaxtaniðurgreiðslu. Reiknað var með að útgjöld vegna þessa úrræðis yrðu allt að 6 milljarðar króna á árinu og að afslátturinn yrði greiddur út á þessu ári og því næsta.

Og fyrsta greiðslan barst sem sagt í gær. Útfærslan mun vera þannig að fólk fær vaxtaniðurgreiðslu upp að 0,6 prósentum af eftirstöðvum lána vegna íbúðarkaupa eins og þær voru í árslok 2010 og 2011. Niðurgreiðslan er ekki tekjutengd en hún er eignatengd. Niðurgreiðslan fer að skerðast ef hrein eign einhleypings fer yfir 10 milljónir króna og fellur niður ef einhleypingur á 20 milljónir eða meira í hreina eign. Hjá einstæðum foreldrum, hjónum og sambúðarfólki byrjar niðurgreiðslan að skerðast ef hrein eign er meiri en 15 milljónir og fellur niður við 30 milljóna króna eign.

Að hámarki getur einhleypingur fengið 200 þúsund krónur í þessa vaxtaniðurgreiðslu en einstæðir foreldrar, hjón og sambúðarfólk 300 þúsund krónur. Afslátturinn verður greiddur út fjórum sinnum, næsta greiðsla er 1. ágúst, og síðan aftur tvisvar á næsta ári. Ekki fengust upplýsingar um það í dag hversu mörg heimili nutu þessa afsláttar nú um mánaðamótin.