Netþrjótur þykist vera Ingibjörg Egils á Facebook

„Vonandi verður aðganginum eytt sem fyrst,“ segir fyrirsætan og framkvæmdastýran Ingibjörg Egilsdóttir. Netþrjótur hefur tekið nafn Ingibjargar ásamt mynd af henni og stofnað aðgang á Facebook. Þrjóturinn hefur þegar bætt nokkrum stúlkum á vinalistann, en á meðal þeirra eru keppendur í Miss Universe árið 2009, en þar keppti Ingibjörg fyrir Íslands hönd. Þá hefur þrjóturinn bætt Crystal Stewart á listann, en hún var valin ungfrú Bandaríkin árið 2008.

Ingibjörg hefur ekki hugmynd um hver er að verki, en býst við að hann eða hún sé erlendis, enda enginn Íslendingur á vinalistanum. Hún er búin að tilkynna notandann með því að smella á þar til gerðan „report“-hnapp, en það virðist vera eina úrræðið við netþrjótum sem þessum.

Unnur Birna Vilhjálmsdóttir lenti í svipuðum aðstæðum árið 2009 þegar netþrjótur tók nafn hennar og ferðaðist um Facebook í hennar nafni. Hann var öllu virkari en þrjótur Ingibjargar og skrifaði meðal annars eftirminnilega stöðuuppfærslu: „Við munum vera hamingjusamur, ekki misrétti:D“ ásamt því að bæta fjölmörgum Íslendingum við vinalistann. Aðgangi hans hefur verið eytt í dag.

Ingibjörg segist ekki hafa sent netþrjótnum skilaboð og segist ekki ætla að berjast við hann. „Ég ætti kannski að adda sjálfri mér og vingast aðeins við mig,“ segir hún í léttum dúr. „Þetta er eflaust eitthvað saklaust, en getur verið óþægilegt. Sérstaklega ef manneskjan fer að eiga í samskiptum við aðra.“ - afb