Vilja sambærilega launahækkun yfir línuna: Ný könnun ASÍ

Flestir meðlimir íslenskra stéttarfélaga vilja sambærilegar launahækkanir fyrir alla í komandi kosningar, eða 94%. Aðeins 6% vilja meiri launahækkanir til þeirra sem starfa í útflutningsgreinum.

Þetta er niðurstaða nýrrar skoðanakönnunar sem Félagsvísindastofnun Háskóla Íslands gerði fyrir ASÍ. Niðurstöður miðast við þá sem tóku afstöðu.

Tæpur helmingur, eða 48%, vill að verkalýðshreyfingin leggi mesta áherslu á að tryggja kaupmátt launa í yfirstandandi kjaraviðræðum en 24% vilja að áherslan sé að tryggja atvinnuöryggi.

Aðeins voru spurðir þeir sem eiga aðild að stéttarfélögum.

Fyrri spurningin hljóðaði þannig:

„Nú standa yfir viðræður um nýja kjarasamninga. Hvort ertu hlynntari því að verkalýðshreyfingin leggi áherslu á sambærilegar launahækkanir fyrir alla, eða meiri launahækkanir til þeirra sem starfa í útflutningsgreinunum, sem njóta nú góðs af gengi krónunnar? "

94% sögðust vilja sambærilegar launahækkanir fyrir alla en 6% vildu að þeir fái meiri launahækkanir sem starfa í útflutningsgreinunum.

Hin spurningin snéri að því hvað verkalýðshreyfingin ætti að leggja mesta áherslu á í kjaraviðræðunum.

19% vildu beinar launahækkanir, 48% að kaupmáttur yrði tryggður og 24% að áherslan væri á atvinnuöryggi.

Félagsvísindastofnun Háskólans gerði skoðanakönnunina fyrir Alþýðusamband Íslands. Úrtakið var 1200 manna slembiúrtak úr þjóðskrá. Könnunin var gerð í gegnum síma dagana 5.-16 febrúar 2011. Nettósvarhlutafall var 62,9%.

Nánari niðurstöður má sjá með því að smella hér.

http://www.asi.is/ResourceImage.aspx?raid=5964