Matt Damon sem Assange

Breski veðbankinn William Hill telur að Matt Damon sé líklegastur til að hreppa hlutverk Ástralans Julians Assange, stofnanda Wikileaks, í nýrri mynd um síðuna sem er í bígerð. Russell Crowe, sem ólst upp í Ástralíu, er einnig talinn líklegur til að fá hlutverkið. Aðrir sem eru nefndir til sögunnar eru Leonardo DiCaprio, Jude Law, Michael Sheen og Chris Cooper.

Leikstjórinn Steven Spielberg og fyrirtæki hans Dreamworks hafa tryggt sér kvikmyndarétt að nýrri bók um Assange og Wikileaks sem kom út í síðasta mánuði eftir tvo blaðamenn breska dagblaðsins Guardian. Bókin fjallar um líf Assange, stofnun síðunnar árið 2006 og leyniskjölin sem Wikileaks hefur birt. Hlutverk Assange er talið afar eftirsóknarvert og ljóst að margar Hollywood-stjörnur verða um hituna.

„Bókin er blanda af Woodward og Bernstein [Watergate-blaðamennirnir], Stieg Larsson og Jason Bourne," segir ritstjóri Guardian. „Julian Assange er manneskja sem enginn handritshöfundur í Hollywood hefði getað fundið upp."