Lady Gaga óheppin í ástum

Vinir söngkonunnar Lady Gaga eru ósáttir við kærasta hennar og halda því fram að hann sé að nota hana.

Lady Gaga er einn frægasti tónlistarmaður síðari tíma en þrátt fyrir frægð, frama og ríkidæmi virðist hún ekki búa við velgengni þegar kemur að ástinni. Söngkonan tók aftur saman við gamlan kærasta, Luc Carl, og vilja vinir hennar meina að Carl sé ekki góður pappír.

Lady Gaga og Carl áttu í áralöngu ástarsambandi löngu áður en stúlkan varð fræg en tóku aftur upp þráðinn fyrir tæpu ári. „Luc notfærði sér frægð Gaga til að landa útgáfusamningi fyrir fyrstu bók sína og Gaga hefur líka verið dugleg við að auglýsa bókina í hinum ýmsu viðtölum,“ var haft eftir einum vini söngkonunnar, sem vill jafnframt meina að söngkonan geri sér grein fyrir því að Carl sé að nota hana.

„Innst inni veit hún að Luc er aðeins með henni vegna frægðar hennar og ríkidæmis. Hann vildi hana ekki áður en hún varð fræg, þá skildi hann hana eftir í sárum en svo kom hann skríðandi aftur. Luc beitir hana andlegu ofbeldi, hann hefur hótað því að ef hún reiti hann til reiði muni hann eyðileggja mannorð hennar. Hann hefur líka montað sig af því að geta stórgrætt á því að selja kynlífsspólur sem hann hefur tekið af sér og Gaga,“ sagði vinurinn, sem vill meina að Gaga muni ekki vera sú sem slíti sambandinu. „Hún hefur mjög lítið sjálfsálit og vegna þessa heldur hún að hún geti ekki gert betur en Luc.“