Rocky Horror slær aðsóknarmet

Leikfélagið setur nýtt met á föstudaginn þegar áhorfendafjöldinn fer í fyrsta skipti yfir fimmtán þúsund manns. Þá verður haldin lokasýning söngleiksins Rocky Horror sem hefur verið sýndur í menningarhúsinu Hofi frá því í fyrra við góðar undirtektir. Hingað til hefur Fló á skinni frá leikárinu 2007 til 2008 verið vinsælasta sýning leikfélagsins til þessa en það breytist á föstudaginn.

„Þetta er alveg æðislegt," segir María Sigurðardóttir, leikhússtjóri Leikfélags Akureyrar. Aðspurð segist hún ekki hafa brugðist við þessari frábæru aðsókn. „Við erum reyndar í stærra húsi núna en nei, við vorum ekki örugg um það. Þetta er mjög ánægjulegt fyrir okkur."

Stutt er síðan haldin var áhorfendasýning á Rocky Horror sem gekk eins og í sögu. Dagblöðum, ljósum og textablöðum var dreift um salinn og tóku áhorfendur virkan þátt í því sem fram fór. „Fólkið þurfti að setja dagblað yfir hausinn í ákveðnu lagi og kveikja á ljósi í öðru lagi. Það var mikil þátttaka og mikið sungið," segir María.

Á meðal gesta voru fyrrverandi nemendur MH sem frumsýndu Rocky Horror fyrir tuttugu árum, þar á meðal Páll Óskar Hjálmtýsson. Eftir sýninguna kíkti hópurinn baksviðs og fór vel á með þeim og núverandi leikaraliðinu, sem samanstendur af Magnúsi Jónssyni, Eyþóri Inga Gunnlaugssyni, Bryndísi Ásmundsdóttur og Andreu Gylfadóttur meðal annarra.- fb

Hér fyrir ofan má sjá lag úr sýningunni, Tíðhnit, sem var flutt í Loga í beinni á Stöð 2 á dögunum.