Um 130 farþegar gistu á Egilsstöðum í nótt

Flugvél Icelandair gat ekki lent í Keflavík í gærkvöldi vegna veðurs og var því ákveðið að snúa henni til Egilsstaða. Vélin lenti á flugvellinum á Egilsstöðum um miðnætti og var um hundrað og þrjátíu farþegum komið fyrir á fjórum gististöðum í bænum í nótt.

Gert er ráð fyrir að flugvélin fari í loftið frá Egilsstöðum um hádegisbilið en samkvæmt reglum um hvíldartíma áhafnar er ekki hægt að fara í loftið fyrr. Guðjón Arngrímsson, upplýsingafulltrúi Icelandair, segir í samtali við fréttastofu að þetta hafi verið eina röskunin á áætlunarflugi félagsins í gærkvöldi.

Það gerist ekki oft að flugvélum sé beint til Egilsstaða ef veður er slæmt í Keflavík en það komi þó fyrir einu sinni til tvisvar á vetri, miðað við undanfarin ár, segir Guðjón.