Veiðiþjófa leitað á Vesturlandi

Svo virðist vera sem veiðiþjófar hafi gert vart við sig á Vesturlandi í síðustu viku. Bræðurnir Benedikt Guðmundsson og Guðmundur Arnar Guðmundsson leigja þar bæinn Smyrhól innst í Haukadal í Dölum til rjúpnaveiða, ásamt bræðrunum Jóni Inga og Sigurði Björnssyni. Þegar þeir Jón Ingi og Sigurður fóru á lendurnar við Smyrhól á laugardagsmorgun var aðkoman ekki frýnileg.

„Tveimur til þremur dögum áður hafa veiðiþjófar farið ófrjálsri hendi um landið á vélsleða frá annað hvorrt Laxárdalsheiði eða Haukadalsskarði og skotið allt kvikt,“ segir Benedikt við Vísi. Benedikt segir að þeir hafi skilið eftir sig tóm skothylki og blóði drifna slóð. Hann segir að mennirnir hafi greinilega verið vanir staðháttum því vélsleðaförin hafi verið við þá staði sem rjúpan heldur sig við Rjúpnafellið og Geldingafellið.

Benedikt segist því vilja biðja alla sem hafa orðið varir við menn með vélsleða á þessum slóðum í síðustu viku um að tilkynna það til viðeigandi yfirvalda. Það sé ótækt að menn séu að veiða á dögum þegar það er óleyfilegt og hins vegar að menn séu að stelast í einkalönd.