Gísli Örn leikstýrir Hróa hetti

Gísli Örn Garðarsson leikstýrir jólasýningu Konunglega Shakespeare-leikhússins, eins virtasta og stærsta leikhúss Bretlands, á þessu ári. Sýningin verður leikgerð Davids Farr eftir sögu Hróa hattar, einnar þekktustu þjóðsagnapersónu Englands, sem rændi frá þeim ríku og gaf hinum fátæka.

„Ég hugsaði mig auðvitað tvisvar um, það er margt á döfinni hjá okkur í Vesturporti og maður leiddi hugann að því. Þetta er síðan auðvitað eitt af virtustu leikhúsum í heimi,“ segir Gísli þegar Fréttablaðið nær tali af honum á miðri æfingu Húsmóðurinnar, leikverks Vesturports sem frumsýnt verður í Borgarleikhúsinu hinn 27. apríl. Gísli hefur þegar fengið Börk Jónsson til að gera leikmynd sýningarinnar og hann útilokar ekki að fleiri íslenskir listamenn komi við sögu. „Maður verður að nýta svona tækifæri til að gefa fólki færi erlendis og prófa nýja hluti.“

Um er ræða gríðarlega stóra sýningu með tólf leikurum plús hljómsveit. Leikhúsið leggur mikið í hana enda verður þetta fyrsta sýningin eftir gagngerar endurbætur á leikhúsinu sjálfu sem gera það að tæknilega best útbúna leikhúsi Bretlands. „Þetta býður upp á heilan leikvöll fyrir mig að leika mér með.“

Leikverkið er hugsað sem fjölskyldusýning og Gísli segir handrit Farrs vera þrususkemmtilegt. „Við unnum auðvitað saman að Hamskiptunum. Hróa er stillt upp sem þjófi, það fá hausar að fjúka og þetta gæti orðið svolítið groddaralegt.“ Undirbúningur hefst strax að lokinni frumsýningu á Húsmóðurinni og verkið verður síðan frumsýnt hinn 1. desember.- fgg