Hálft tonn af ullarfötum til Japans

Rúmt hálft tonn af ullarfatnaði verður sent til Japans frá Íslandi á næstunni en það voru þrjár japanskar konur sem búsettar eru hér á landi sem hófu söfnun fyrir fórnarlömb hamfaranna í Japan. Þær Miyako Þórðarson, Yoko Arai og Yayoi Shimomura  vildu gera eitthvað til að hjálpa löndum sínum í Japan og höfðu því samband við Póstinn um að aðstoða þær við að senda hlífðarfatnaðinn úr íslensku ulllinni til Japans.

 

„Þær voru búnar að hugsa lengi hvernig þær gætu lagt sitt af mörkum og komust að því að erfitt er að senda hjálpargögn á þau svæði sem verst urðu úti. Þær fengu upplýsingar um það að mikil þörf er á hlífðarfatnaði og byrjuðu þær því að hekla og prjóna  úr íslensku ullinni.  Á síðasta ári fóru þær á prjónanámskeið fyrir byrjendur þar sem þær kynntust  gæðum íslensku ullarinnar sem þær segja að sé bæði létt og hlý,“ segir í tilkynningu.

Um 300 manns höfðu samband við Póstinn og vildu bjóða fram hjálp sína með því að prjóna fyrir Japan. „Samstarfsfélagar, kvenfélagskonur, saumaklúbbar jafnt sem og einstaklingar prjónuðu 6200 flíkur og munu nú um 550 kíló vera send til héraðanna Miyagi-Ken og Iwate-Ken sem urðu hvað verst úti í hamförunum í Japan.“

„Áður voru Miyako, Yoko og Yayoi búnar að fá með sér í lið Hrafnistu í Reykjavík og Hafnarfirði þar sem allir hafa keppst við að prjóna jafnt starfsfólk, vistfólk og aðstandendur þeirra.  Einnig bættust í hópinn kvenfélagskonur í Grensáskirkju ásamt starfsfólki Hagstofu Íslands er þar vinnur Yayoi.“

 

Miyako Þórðarson, Yoko Arai og Yayoi Shimomura  þakka hlýjan hug sem landsmenn hafa sýnt í þessu átaki.