Manúela íhugar að stefna Grétari vegna njósna

Grétar Rafn Steinsson réði einkaspæjara til að fylgjast með ferðum fyrrverandi eiginkonu sinnar, Manúelu Óskar Harðardóttur, á meðan skilnaðarmál þeirra stóð yfir. Þá lét hann koma fyrir staðsetningartæki á bíl sem hún hafði til umráða. Hún íhugar að leita réttar síns hér á landi.

Dómur féll í skilnaðarmáli Grétars og Manúelu í Bretlandi á föstudag þar sem dómari úrskurðaði um jafna skiptingu eigna þeirra.

Fyrir dóminn lagði Grétar skýrslu rannsóknarmanna sem hann hafði ráðið til að sýna fram á að Manúela væri þegar komin í annað samband og þyrfti því á minna fé að halda frá honum til framfærslu en ella.

Manúela og Grétar Rafn undirrituðu trúnaðarsamkomulag um að allt sem fram hefði komið fyrir breskum dómstólum um mál þeirra væri bundið trúnaði.

Fjallað var um málið á vef DV í morgun. Lögmaður Manúelu segir að þar hafi hallað réttu máli og því ræði hann nú við fjölmiðla.

„Hún vill að sjálfsögðu halda trúnaðarsamkomulagið. En það þarf að leiðrétta rangfærslur hvað þetta varðar," sagði lögfræðingur Manúelu, Vilhjálmur H. Vilhjálmsson.

Í skýrslunni má sjá nákvæmar skýrslur um hvar Manúela hélt sig, með hverjum og hvað hún gerði. Þá er einnig skráð hvort atvikin eru tekin upp á myndband eða ljósmyndir teknar af henni.

Vilhjálmur telur að með þessum aðgerðum hafi verið brotið á friðhelgi einkalífs Manúelu. Hann bendir á að fyrrverandi eiginmaður þingmanns hafi verið dæmdur á dögunum fyrir að koma fyrir eftirlitsbúnaði í bíl í sameiginlegri eigu þeirra eftir sambandsslit þeirra.

Í skýrslunni sést að Grétar gefur samþykki sitt fyrir því að staðsetningartæki sé sett í bílinn í því skyni að fylgjast með Manúelu allan sólarhringinn. Þá hafi eftirlitsmenn farið inn í bifreið sem Manúela hafði til umráða og tekið myndir af trúnaðargögnum, meðal annars bankaupplýsingum og minnismiða.

Þá segir Vilhjálmur að Grétar hafi farið inn á áður sameiginlegt heimili þeirra og tekið þar myndir.

Hvorki náðist tal af Grétari né lögmanni hans við vinnslu fréttarinnar.

Samkvæmt lögmönnum sem fréttastofa talaði í dag við þykja forsendur Vilhjálms heldur hæpnar og vandséð að hægt sé að sækja Grétar til saka á Íslandi fyrir meint brot sem ekki voru gerðar athugasemdir við fyrir breskum dómstólum, en Manúela vill höfða málið hér á landi.



Sjá umfjöllun í meðfylgjandi myndbroti.