Stefna að því að gera veskið óþarft

Valitor mun bráðlega fara af stað með verkefni þar sem hópi viðskiptavina fyrirtækisins verður boðið að nota farsíma sinn sem kreditkort. Um er að ræða samstarfsverkefni Valitor, Visa í Evrópu og norska tækniöryggisfyrirtækisins Oberthur en Ísland verður tilraunamarkaður fyrir þessa nýju tækni.

„Það er mér sérstök ánægja að kynna í dag nýjung á sviði greiðslulausna sem mun á næstu misserum breyta því hvernig fólk hagar sínu daglega lífi,“ sagði Viðar Þorkelsson, forstjóri Valitor, á blaðamannafundi í Hörpu í gær. Viðar sagði stefnu fyrirtækjanna vera að gera veskið óþarft með því að færa kredit- og debetkort inn í farsímann.

Tæknin gerir einstaklingum kleift að greiða fyrir hvers konar vörur og þjónustu með farsíma án snertingar við posa eða annan búnað.

Tilraunaverkefnið fer af stað í byrjun næsta árs og verður þúsund símnotendum boðið að taka þátt. Auk þess koma að því fjölmargir seljendur vöru og þjónustu. Verkefnið á Íslandi er það langstærsta sem ráðist hefur verið í með þessari tækni en mikil ánægja hefur mælst með hana þar sem hún hefur verið prófuð.

Viðar segir að gangi allt að óskum verði mögulegt að fara með verkefnið í almenna dreifingu á seinni hluta árs 2013.

- mþl