Íslendingar næsthamingjusamastir á eftir Dönum

Íslendingar eru næsthamingjusamasta þjóð veraldar á eftir Dönum. Þetta er niðurstaða Efnahags- og framfarastofnunar Evrópu (OECD) sem hefur gefið út skýrslu um vellíðan og hamingju í 40 löndum víða um heim.

Á eftir Dönum og Íslendingum koma Japanar, Indónesar, Hollendingar, Norðmenn og Svíar. Niðurstöðurnar byggja á svörum íbúa í löndunum við spurningum um líðan sína. Tyrkir, Eistar og Ungverjar voru óhamingjusamastir þeirra þjóða sem rannsakaðar voru.

Í skýrslunni er einnig gerð tilraun til að mæla lífskjör í löndum OECD. Þar trónir Danmörk einnig á toppnum en Ísland er í 16. til 17. sæti ásamt Belgíu. Á eftir Danmörku koma Kanada og Noregur á lífskjaralistanum.

Í skýrslunni er litið til ellefu þátta sem taldir eru hafa áhrif á hamingju og vellíðan. Þeirra á meðal eru tekjur, starfsumhverfi og húsnæði en einnig heilsa, menntun, samheldni þjóðfélags og hreinleiki umhverfis. Skýrslan, sem kom út á miðvikudag, er gefin út í tengslum við vinnu OECD við að hanna lífskjaramælikvarða sem eru víðtækari en verg landsframleiðsla.

Meðal niðurstaðna skýrslunnar eru að það að vera í starfi er lykilatriði þegar kemur að vellíðan einstaklinga. Gott starf tryggir tekjur, hefur jákvæð áhrif á sjálfsmynd og ýtir undir félagsleg tengsl.

- mþl