Icesave á lokastigi

Icesave-frumvarpið verður að lögum á Alþingi í vikunni. Þeir fulltrúar stjórnarandstöðunnar sem eru mótfallnir frumvarpinu telja flýtimeðferð frumvarpsins til þess gerða að koma í veg fyrir að nógu margar undirskriftir safnist til þess að forseti Íslands leggi frumvarpið fyrir þjóðina.

Icesave-frumvarpið verður að lögum á Alþingi í vikunni. Þeir fulltrúar stjórnarandstöðunnar sem eru mótfallnir frumvarpinu telja flýtimeðferð frumvarpsins til þess gerða að koma í veg fyrir að nógu margar undirskriftir safnist til þess að forseti Íslands leggi frumvarpið fyrir þjóðina.

Fjárlaganefnd afgreiddi frumvarpið nú á sjöunda tímanum en það verður þriðja umræðan um málið fer þá fram á morgun. Meirihluti fjárlaganefndar reiknar með því að frumvarpið verði að lögum á miðvikudag. Þetta staðfestir Oddný G. Harðardóttir, formaður nefndarinnar, í samtali við fréttastofu. Hún mun eiga fund með Ástu Ragnheiði Jóhannesdóttur, forseta Alþingis, í kvöld til að fjalla um hvenær atkvæðagreiðslan fer fram.

Höskuldur Þórhallsson, fulltrúi framsóknarflokksins í fjárlaganefnd, er ósáttur við hversu stuttan tíma nefndin gaf sér til að fjalla um frumvarpið þar sem enn á eftir að fjalla um breytingartillögur hans og Þórs Saari.

,,Það er eins og það hafi myndast einhver þrýstingur á að klára málið á sem skemmstum tíma, rífa þetta enn einu sinni út úr nefndinni. Ég get ekki betur séð en að það sé vegna þess að menn óttast að það safnist saman fleiri undirskriftir fyrir því að setja málið í þjóðaratkvæðagreiðslu," segir Höskuldur.

Hann telur því að þeir þingmenn sem eru fylgjandi því að Icesave-frumvarpið verði samþykkt búist við því að það margar undirskriftir safnist að forseti Íslands finni sig knúinn til að leggja frumvarpið í dóm þjóðarinnar.

,,Það er það sem maður óttast. Það liggur í sjálfu sér ekkert á að taka málið út úr nefndinni með þeim hraði sem verið er að gera."