Draumkennt augnaráð kvenna

„Eðlileg gerviaugnhár eru kostur sem æ fleiri konur kjósa fyrir brúðkaup, ferðalög og lífið sjálft, því þannig eru þær alltaf fínar og með sláandi flottan augnsvip, án fyrirhafnar og þess að taka nokkurn tímann um maskara," segir Ágústa Kristjánsdóttir snyrtifræðingur og eigandi Snyrtistofu Ágústu í Hafnarstræti.

Þar er heitasta fegrunarmeðferðin nú stök, álímd gerviaugnhár sem gerir konur íðilfagrar með draumkenndan augnsvip við öll tækifæri, allan sólarhringinn.

„Það er útilokað að koma auga á að augnhárin séu óekta því hvert hár er límt ofan á náttúrulegt augnhár konunnar, þétt upp við augnlokin, og útkoman gullfalleg, uppbrett og þétt augnháralína," segir Ágústa sem tekur á móti konum á öllum aldri í augnháralengingu, en hægt er að velja úr mismunandi þykktum og lengdum.

„Augnhárin má hafa árið um kring en þá þarf að koma í uppfyllingu á eins og hálfs mánaðar fresti sem er líftími náttúrulegra augnhára sem losna eitt af öðru í eðlilegum vaxtarhring augnhársins," segir Ágústa, en gerviaugnhárin eru litekta og því óþarfi að mála þau, sem sparar konum tíma, fyrirhöfn og snyrtivörukaup.

„Munurinn er mikill og margar okkar viðskiptavina hafa skartað augnháralengingum í nokkur ár. Þeim þykir notalegt að koma í meðferðina sem tekur um tvo tíma, því nákvæmnisvinnan er mikil en á móti kemur að okkur snyrtifræðingum þykir vinnan skemmtileg og svipuð því að hekla eða prjóna á meðan viðskiptavinurinn liggur undir hlýju teppi í algerri slökun," segir Ágústa.

Öll efni til augnháralenginga hjá Snyrtistofu Ágústu koma frá Lash Perfect og eru ofnæmisprófuð og í hæsta gæðaflokki.

thordis@frettabladid.is