Á stall með Coco Chanel

Sýning til heiðurs hinum litla og látlausa svarta kjól Coco Chanel hefur verið opnuð í The Civic Gallery í Barnsley á Englandi í tilefni þess að 85 ár eru liðin frá því hann leit dagsins ljós. Sýningin spannar mikilvægustu svörtu kjóla síðustu níu áratuganna og nokkra nýja og forvitnilega að auki, þar á meðal eftir íslenska fatahönnuðinn Veru Þórðardóttur.

„Auðvitað er einstakur heiður að fá að vera í útvöldum hópi á jafn sögulegri sýningu," segir Vera, glöð í bragði.

Félagsskapurinn er enda ekki af verri endanum þar sem mörg þekktustu nöfnin í tískuiðnaðinum eiga verk á sýningunni, Vivienne Westwood, Gucci, Lanvin og YSL svo fáein séu nefnd. „Og viðtökurnar hafa verið alveg frábærar," bætir hún við og útilokar ekki að sýningin eigi eftir að opna henni fleiri dyr í tískuheiminum.

Þetta er ekki í fyrsta sinn sem hönnun Veru vekur athygli. Hún komst í heimspressuna í fyrra þegar Lady Gaga klæddist jakka eftir hana á tónleikum Eltons John og telur líklegt að það hafi orðið til þess að þátttakan á sýningunni bauðst.

„Ég er viss um þeir hafa í framhaldi kynnt sér heimasíðuna mína því þar gefur að líta svartan kjól eftir mig," útskýrir Vera, sem fékk frjálsar hendur við að hanna flík á sýninguna en útkoman varð glæsilegur svartur sílikonkjóll.

Leiðir þeirra Veru og Gaga halda síðan áfram að skarast því 20. maí, sama dag og sýningunni í The Civic Gallery lýkur, kemur út bókin The Secret Book on Lady Gaga. Franski blaðamaðurinn Alexandra Boucherifi hefur þar tekið saman hönnun og list sem tengist Lady Gaga, meðal annars mynd af umræddum jakka Veru.

„Boucherifi stóð fyrir sýningu um fatastíl Lady Gaga í París og var jakkinn til sýnis. Þúsundir manna sóttu hana á aðeins nokkrum dögum sem varð til þess að hugmyndin að bókinni kviknaði og mér var boðið að vera með," segir Vera og kveðst vera upp með sér þar sem úr nægu sé að velja.

„Auk þess sem margir af þekktustu hönnuðum heims hafa klætt Lady Gaga."

roald@frettabladid.is