Stunginn í hálsinn

Þrir unglingar, tveir piltar og ein stúlka, réðust óboðnir inn í teiti í Mosfellsbæ í gærkvöld. Þegar gestir í teitinu hugðust vísa þeim þeim út brást annar pilturinn við með því að lemja einn gestinn með steikarpönnu í andlitið. Hinn pilturinn tók upp hníf og stakk einn gestinn í hálsinn. Ekki hafa fengist upplýsingar um ástand hinna slösuðu.

Gestir í teitinu náðu að yfirbuga manninn með steikarpönnuna og héldu honum þangað til lögreglan kom í húsið. Pilturinn með hnífinn og stúlkan flúðu en voru handtekin í Grafarvogi stuttu seinna. Öll þrjú gistu fangageymslur og verða yfirheyrð í dag. Lögreglan telur fullvíst að þau hafi verið undir áhrifum einhverrra efna, en veit ekki hvaða efni það gæti hafa verið.

Þá var ráðist á mann og sparkað í höfuð hans, þar sem hann lá í götunni við skemmtistað í Engihjalla í Kópavogi. Hann slapp með minniháttar meiðsl. Árásarmenn voru enn á staðnum þegar lögreglu bar að garði. Enn á eftir að koma í ljós hvort þeir verði ákærðir.