Krefjast þess að málið verði látið niður falla

Ísland hafnar því að brot gegn innistæðutryggingatilskipun Evrópusambandsins hafi átt sér stað og krefst þess að mál Eftirlitsstofnunar EFTA, ESA verði látið niður falla. Þetta er á meðal þess sem fram kemur í bréfi Íslands til stofnunarinnar þar sem málstaður Íslands í Icesave málinu er settur fram. en sendiherra Íslands í Brussel afhenti bréf efnahags- og viðskiptaráðuneytisins þess efnis á skrifstofu stofnunarinnar í dag.

Árni Páll Árnason efnahags- og viðskiptaráðherra kynnti afstöðu Íslands á fundi í dag. Í bréfinu kemur fram að allar horfur séu á því að þrotabú Landsbankans muni standa undir þorra krafna vegna innistæðna og að útgreiðslur úr búinu hefjist á næstu misserum. Þó er bent á að einhliða aðgerðir Breta og Hollendinga hafi tafið fyrir. „Þar sem Ísland hafi ekki brotið gegn samningsskuldbindingum með neinum hætti telji stjórnvöld að ESA geti lokið málinu, án frekari aðgerða," segir í tilkynningu frá ráðuneytinu.

„Efnahags- og viðskiptaráðuneytið þakkar þeim sérfræðingum og félagasamtökum sem lögðu til gögn og liðsinntu við undirbúning málsins. Þóra Margrét Hjaltested og Kristján Andri Stefánsson önnuðust verkstjórn fyrir hönd efnahags- og viðskiptaráðuneytisins og utanríkisráðuneytisins og nutu vinnuframlags m.a. Jóhannesar Karls Sveinssonar, Peters Dyrberg, Dóru Guðmundsdóttur, Eiríks S. Svavarssonar, Reimars Péturssonar og Stefáns Más Stefánssonar," segir einnig.



Hér má sjá bréfið í heild sinni, á ensku.