Myndir frá björgunaraðgerðum á Eyjafjallajökli

Freyr Ingi Björnsson liðsmaður björgunarsveitarinnar Ársæls tók meðfylgjandi myndir frá björgunaraðgerðum á Eyjafjallajökli í nótt. Leitað var að þýskum göngumanni sem hafði orðið viðskila við félaga sína. Maðurinn fannst í morgun heill á húfi en aðstæður á jöklinum voru slæmar miðað við árstíma því jökullinn er krossprunginn eftir eldgosið í fyrra.

Freyr Ingi var kallaður út um klukkan sjö í gærkvöldi og kom til byggða klukkan ellefu í morgun. Hann segir veðrið á jöklinum hafa verið afar slæmt og því skipt miklu máli að björgunarsveitirnar færu strax til leitar. Maðurinn fannst að lokum þegar sími hans komst í samband. Þá var hægt að miða út staðsetningu hans og fannst hann þar sem hann hafði komið sér fyrir nálægt hábungu jökulsins.