Flugmenn stórskaða ferðaþjónustuna

Samtök ferðaþjónustunnar segja aðgerðir flugmanna Icelandair og niðurfellingu fluga stórskaða ferðaþjónustuna hér á landi. Þá segja samtökin að verkfallsvopnið ekki hafa verið lögleitt til þess að þjóna hálaunastéttum í einokunaraðstöðu.

Icelandair hefur fellt niður sex flug félagsins á sunnudag vegna verkfallsaðgerða flugmanna, sem hófust klukkan tvö í dag. Jafnframt hefur Icelandair tilkynnt að náist ekki samningar muni fyrirsjáanlega þurfa að fella niður sex flug til viðbótar á mánudag og verður það gert með sólahrings fyrirvara.

Samtök ferðaþjónustunnar segja í tilkynningu að víða hafi hægt á bókunum síðustu daga og nú þegar flug hafi verið fellt niður sé viðbúið að erlendar ferðaskrifstofur muni afbóka hópa og senda þá annað. Fyrirtæki muni því verða fyrir miklu tjóni.

„Hótanir um truflanir á flugi eru ekkert innanlandsmál, slíkar fréttir berast víða um heim og erlendar ferðaskrifstofur taka ekki áhættu á senda hópa á svæði þar sem engir aðrir samgöngumöguleikar eru til staðar."

Hálaunahópur í einokunaraðstöðu

Þá segir í tilkynningu Samtaka ferðaþjónustunnar: „Það er búið að semja við ca. 85% launaþega á almennum vinnumarkaði án verkfallsaðgerða en verkfallsvopnið var ekki lögleitt til þess að þjóna hálaunastéttum í einokunaraðstöðu."

Samtök ferðaþjónustunnar segja mikið búið að ganga á hjá ferðaþjónustunni að undanförnu. „Mannfólkið getur ekki gert við eldgosi og kulda en þarna er hálaunahópur að stofna til tekjumissis fjölda fyrirtækja á landinu."