Isavia gert að greiða bætur fyrir kynferðislega áreitni starfsmanns

„Dómurinn var að falla í dag," svarar Hjördís Guðmundsdóttir, upplýsingafulltrúi Isavia, sem rekur Keflavíkurflugvöll, þegar fréttamaður spurði hana hvort það væri eðlilegt að starfsmaður, sem beitti undirmanns sinn kynferðislegri áreitni, væri enn við störf hjá fyrirtækinu.

Dómur féll í dag í Héraðsdómi Reykjaness þar sem Isavia var dæmt til þess að greiða konunni 1,8 milljónir vegna kynferðislegrar áreitni af hálfu starfsmannsins í mars 2009.

Málavextir voru þeir að maðurinn, sem var þá framkvæmdastjóri öryggissviðs Keflavíkurflugvallar, særði blygðunarkennd konunnar með því að vera nakinn í heitum potti í vinnuferð sem þau fóru í. Atvikið átti sér stað í sumarbústað í Grímsnesi, en auk konunnar og yfirmannsins, var annar starfsmaður með í för.

Yfirmaðurinn reyndi einnig að komast inn í herbergi konunnar þrátt fyrir að hún var búin að setja ferðatösku fyrir hurðina en hún gat ekki læst henni.

Eins og fyrr segir er starfsmaðurinn enn að störfum hjá fyrirtækinu á meðan konan lét af störfum eftir atvikið þar sem hún mætti aðgerðarleysi yfirmanna í kjölfarið og ábyrgð hennar í starfi minnkuð án skýringa.

Yfirlýsingar er að vænta frá Isavia síðar í dag.