Vigdís himinlifandi yfir ákvörðun Ásmundar Einars

„Ég er himinlifandi yfir þessum tíðindum," segir Vigdís Hauksdóttir, þingmaður Framsóknarflokksins, um þá ákvörðun Ásmundar Einars Daðasonar að ganga til liðs við Framsóknarflokkinn. „Það er alltaf gaman þegar þingflokkurinn stækkar," segir Sigurður Ingi Jóhannsson, varaformaður þingflokks framsóknarmanna.

Ásmundur Einar var kjörinn á þing fyrir Vinstri hreyfinguna grænt framboð árið 2009. Hann sagði sig úr þingflokki Vinstri grænna í apríl, og sagði þá helstu ástæða þess að hann styddi ekki ríkisstjórnina vera aðildarumsókn Íslands að Evrópusambandinu. Í yfirlýsingu segir Ásmundur Einar m.a. að Framsóknarflokkurinn hafi tekið jákvæðum breytingum undir forystu Sigmundar Davíðs Guðlaugssonar.

„Þetta kemur kannski ekkert rosalega á óvart eftir að hann yfirgaf þingflokk Vinstri grænna," segir Vigdís. Hún og Sigurður segja að Ásmundi Einari hafi verið vel tekið á þingflokksfundi framsóknarmanna sem var að ljúka.

„Við Ásmundur Einar erum nátturlega með mjög líkar skoðanir eins og t.a.m. í Evrópumálunum, varðandi Icesave og í málefnum heimilanna. Þannig að ég tel mig eiga mikla samleið með honum," segir Vigdís.