Lögreglan minnir á endurskinsmerki

Nú þegar svartasta skammdegið fer að skella á þykir rétt að minna aftur á mikilvægi endurskinsmerkja fyrir gangandi vegfarendur í umferðinni.  

Lögreglan á höfuðborgarsvæðinu hvetur foreldra til að setja endurskinsmerki á fatnað barna sinna sem oftar en ekki eru dökkklædd á ferð.

Þá er ekki síður mikilvægt að fullorðnir noti þennan sjálfsagða og einfalda öryggisbúnað sér einnig til verndar.

Hlauparar og reiðhjólamenn eru líka minntir sérstaklega á mikilvægi endurskinsmerkja en þeir síðarnefndu eru jafnframt beðnir að ganga úr skugga um að ljósabúnaður hjólanna sé í lagi.