Óli Geir styrkti Feministafélagið um 50 þúsund

Ólafur Geir Jónsson, sá sem var aðalvítaminsprautan að baki Dirty Weekend kvöldi á Players á laugardaginn, lagði í kvöld 50 þúsund króna styrk inn á reikning Feministafélags Íslands.

Með því vill hann þakka þeim fyrir að hafa auglýst kvöldið rækilega fyrir hann í aðdraganda þess. Feministar gerðu, sem kunnugt er, miklar athugasemdir við það að kvöldið skyldi hafa farið fram í Kópavogi, meðal annars á þeirri forsendu að þar kæmu fram klæðalitlar stúlkur. Mikil fjölmiðlaumfjöllun var um skemmtunina fyrir helgi, einkum vegna gagnrýninnar.

„Það bara gekk frábærlega og fór allt vel fram," segir Ólafur Geir í samtali við Vísi um ástæður þess að hann ákvað að leggja inn á reikning Feministafélagsins. Hann segir ljóst að þessi kvöld verði haldin áfram. Hann býst við því að næsta kvöld verði haldið í janúar eða febrúar á næsta ári í Sjallanum á Akureyri.