Útilokar samning til eins árs

Vilhjálmur Egilsson, framkvæmdastjóri Samtaka atvinnulífsins, útilokar að gengið verði að tilboði Starfsgreinasambandsins um kjarasamning til eins árs og hækkun lágmarkslauna í tvö hundruð þúsund krónur.

Ríkissáttasemjari hefur boðað fulltrúa Samtaka atvinnulífsins og Starfsgreinasambandsins til fundar í dag.

„Til þess að geta réttlætt launahækkanirnar verðum við að sjá fram á að hagvöxtur verði meiri en spár gera ráð fyrir,“ segir Vilhjálmur og bætir við að tryggja þurfi meiri fjárfestingu.

Vilhjálmur segir að ekki sé hægt að taka tölur úr þriggja ára samningnum og setja í samning til eins árs. „Það gengur ekki að tala um svo miklar launahækkanir í öðru samhengi en við atvinnuleiðina.“

Vilhjálmur segir að reynt verði að ljúka málum við ríkisstjórnina til að hægt verði að fara atvinnuleiðina. Þá verði reynt að ljúka því sem út af stóð við Starfsgreinasambandið, varðandi ræstingar- og fiskvinnslufólk. „Það er mikil óvissa. Ég tel okkur geta lokið málum varðandi ASÍ en meiri óvissa er með ríkisstjórnina.“- mmf