Grundvöllur útgáfu hruninn

Grundvöllur útgáfu námsbóka fyrir framhaldsskóla er hruninn að sögn helstu útgefenda hér á landi. Þeir telja að jafnvel verði ekki þróað eða gefið út námsefni á næstunni. Kristján B. Jónasson, formaður Félags íslenskra bókaútgefenda, segir í samtali við Fréttablaðið að vendipunktur hafi verið í ár.

„Við vorum að sjá samdrátt ár frá ári, en síðustu tvö ár hefur markaðurinn fyrir námsbækur í framhaldsskólum hrunið."

Egill Örn Jóhannsson, framkvæmdastjóri Forlagsins, segist uggandi yfir framhaldinu. „Staðan á útgáfu kennslubóka hjá okkur er grafalvarleg og við sjáum ekki fram á að geta þróað eða gefið út nýjar bækur. Við erum að horfa upp á meira en 50 prósenta samdrátt í sölu nýrra kennslubóka á síðasta ári og þess vegna er gjörsamlega útilokað að viðhalda mörg hundruð bóka­titlum við núverandi aðstæður."

Egill segir nokkrar ástæður liggja þar að baki. „Það er kannski helst aukin áhersla á skiptibókamarkaði sem hefur í raun kippt grundvelli undan útgáfu og sölu nýrra kennslubóka. Þó skil ég það vel eins og árferðið er núna þar sem foreldrar og nemendur leita í ódýra vöru þar sem þeir geta fundið hana."

Forlagið er umsvifamest þeirra sem gefa út bækur fyrir framhaldsskóla hér á landi en meðal annarra útgáfufélaga sem eru í sömu stöðu eru Iðnú og Bjartur.

Egill segir að erfitt sé að sjá lausnir í stöðunni til skamms tíma. „Ég held að byltingin sem er í vændum verði rafbókavæðing þegar við getum boðið öllum nemum upp á íslensk kennslugögn með rafrænum hætti. Það mun hins vegar ekki gerast á einni nóttu og ég hef áhyggjur af tímanum fram að því. Þau ár geta orðið ansi strembin fyrir útgefendur." - þj