Opnar kaffihús á besta stað í Kaupmannahöfn

„Staðurinn er svona góð blanda af kósí kaffihúsi og menningarlegum vínbar,“ segir Dóra Dúna Sighvatsdóttir en hún opnaði á dögunum kaffihúsið The Log Lady á besta stað í miðbæ Kaupmannahafnar, nánar tiltekið við á Studiestræde, hliðargötu af verslunargötunni frægu, Strikinu.

Dóra á og rekur kaffihúsið með vinkonu sinni Henriette og hefur verið mikið að gera síðan þær opnuðu „Við getum alls ekki kvartað yfir viðtökunum og þetta er ótrúlega gaman,“ segir Dóra. Hún er alls ekki ókunn barrekstri en hún opnaði á sínum tíma barinn Jolene með nöfnu sinni Takefusa. Það virðist vera eins konar tískubóla hjá Íslendingum að opna kaffihús eða bar um leið og þeir flytja til Kaupmannahafnar, kann Dóra Dúna einhverja útskýringu á því? „Nei, ætli það sé ekki bara tilviljun. Það er allavega ekki auðveldara ferli hér en heima. Allt tekur miklu lengri tíma hérna enda Danir ekki þekktir fyrir að flýta sér og öll leyfi renna mjög hægt í gegnum kerfið. Mér finnst samt mjög gaman að standa í þessu.“

Í fyrra seldi hún sinn hlut í Jolene-barnum, sem henni fannst vera búinn að missa sjarmann, og hóf þá að leggja drög að kaffihúsinu. „Mig langaði að opna stað sem var meira fullorðins og menningarlegri. Við ætlum til dæmis að bjóða upp á ljóðaupplestur, fræðandi fyrirlestra og sérstök spákonukvöld,“ segir hún en nafn staðarins, The Log Lady, er komið frá sjónvarpsþáttunum vinsælu Twin Peaks sem eru í sérstöku uppáhaldi hjá henni. „Ég elska þessa þætti og karakterinn sem gengur undir nafninu The Log Lady er svona spákona sem er sjúk í tré og við reyndum að taka mið af því þegar við hönnuðum staðinn sem er kannski smá eins og notalegur sumarbústaður.“

Dóra Dúna fékk einmitt hugmynd að hönnuninni frá plötusnúðnum og klipparanum Jóni Atla Helgasyni en hann er nýfluttur til Kaupmannahafnar og ætlar eitthvað að þeyta skífum fyrir gesti staðarins í framtíðinni. „Hann er svo skemmtilegur og kom með margar frábærar hugmyndir. Við erum til dæmis með einn vegg sem heitir fermingarveggurinn og báðum alla vini okkar um koma með fermingarmyndir af sér og hengja upp á vegg. Það er mjög fyndið þar sem flestir geta nú verið sammála um að maður er ekki á sínu fallegasta skeiði í kringum fermingaraldurinn. Þessi veggur fær mann allavega til að brosa.“

Dóra Dúna hefur nú búið í Danmörku í fjögur ár og líkar vel. Hún er búin að koma sér vel fyrir í borginni þar sem hún býr ásamt kærustu sinni Djunu Barnes, sem er ein af frægustu plötusnúðum Danmerkur. „Ég er komin til að vera og held að ég geti hiklaust sagt að ég muni aldrei flytja aftur til Íslands.Tækifærin leynast frekar hér en heima,“ segir Dóra Dúna áður en hún snýr sér aftur að kaffiþyrstum gestunum. alfrun@frettabladid.is