Mugison hélt tónleika á hótelherbergi

Tónlistarmaðurinn Mugison er eflaust fyrsti Íslendingurinn sem efnir loforð sitt í nýja ferðamannaátakinu Ísland - allt árið. Hann hélt tónleika fyrir hótelgesti á KEX hostel við Skúlagötu við góðar undirtektir og Ísland í dag fylgdist með.

Verkefninu var hrundið af stað í síðustu viku en það er samþætt markaðsverkefni sem miðar að því að efla vetrarferðaþjónustu og jafna árstíðarsveiflu í íslenskri ferðaþjónustu. Íslendingar eru þess vegna hvattir til að bjóða ferðamönnum að gera eitthvað skemmtilegt með sér. Forsetinn ætlar að bjóða í pönnukökur á Bessastöðum og iðnaðarráðherra í fótabað á Seltjarnarnesi.

„Ég er mjög hrifinn af þessarri hugmynd,“ segir Mugison. Ástæðan er sú að hann lenti í því í Færeyjum fyrir nokkrum árum að vera að pissa utan í grindverk og eigandinn kom og bað hann frekar um að koma inn á klósettið. Auk þess ætti hann bjór í ísskápnum og fleira sem stæði honum til boða. „Það væri flott ef allir væru svona,“ segir Mugison.