Vill hækka laun lækna til að sporna við yfirvofandi læknaskorti

Þriðjungur þeirra sem hafa íslenskt læknaleyfi starfa erlendis. Fyrrverandi landlæknir og forseti læknadeildar Háskóla Íslands segir mikla þörf á að bæta kaup og kjör lækna til að forðast alvarlegar afleiðingar læknaskorts.

Undanfarin misseri hefur mikil umræða skapast um vaxandi læknaskort hér á landi en um 100 læknar hafa farið frá landi á undanförnum tveimur árum.

Tvær ástæður er aðallega nefndar fyrir því að læknar kjósi að starfa erlendis, annars vegar eru kaup og kjör mun lakari hér á landi og hins vegar eru vinnuaðstæður ekki sambærilegar því sem gengur og gerist í öðrum löndum.

Sigurður Guðmundsson forseti læknadeildar Háskóla Íslands hefur áhyggjur af þessari þróun.

„Málum er þannig háttað núna það eru sirka 15-1600 manns með lækningaleyfi á Íslandi og þar af er um þriðjungur starfandi erlendis," segir Sigurður.

Þá hefur enginn sem farið hefur í sérfræðinám erlendis komið til baka síðan árið 2008. Sigurður segir afleiðingar þessa vera að sumar sérgreinar verði svo fámennar að þær geti ekki sinnt almennilega sínum sjúklingahópi.

„Það þýðir þá það að í besta falli að við yrðum að fara að senda fleiri sjúklinga úr landi en að við gerum núna og í versta falli gæti þetta þýtt verri þjónustu þannig það horfi til vandræða þannig það sé ákveðin ógn við öryggi sjúklinga ef það fækkar verulega í stéttinni," segir Sigurður.

Hann segir að þörf á umbótum til að fá eitthvað af þessum 500 læknum aftur heim.

„Til þess að geta gert það þá þurfum við að bæta kaup og kjör það er enginn vafi á því við þurfum að gera það og ef við getum bætt vinnulag/vinnuaðstöðu inni í heilbrigðiskerfinu þá væri líka mjög mikill styrkur í því."