Reka ísbjarnahótel í Manitoba

Ísbjarnardráp, eins og á Hornströndum í gær, myndi kalla á lögreglurannsókn á Svalbarða og líklega leiða til ákæru. Íslenskur þyrluflugmaður, sem fangað hefur sexhundruð ísbirni í Kanada, segir einfalt að ná þeim lifandi. Í Manitoba eru vandræðabirnir settir á ísbjarnahótel.

Í frétt Stöðvar 2 frá Svalbarða fyrir tíu dögum kom fram að ólíkt því sem tíðkast á Íslandi er það ekki það fyrsta sem menn gera að skjóta ísbirni sem koma nærri mönnum. Þar kallar ísbjarnardráp undantekningalaust á lögreglurannsókn og ef ekki er sýnt fram á nauðvörn í lífsháska eru menn ákærðir. Allt annað er reynt en að skjóta þá.

„Það síðasta sem menn gera er að skjóta. Það viljum við helst ekki gera," segir Henrik Joseffsson, leiðsögumaður á ísbjarnaslóðum Svalbarða.

Benedikt Henry Guðmundsson þyrluflugmaður vann við það í þrjú ár í Kanada að fljúga með skyttur með deyfibyssur til að svæfa og merkja ísbirni. Skotið var úr fimm til tíu metra hæð, ýmist í háls eða afturenda til að skaða þá sem minnst. Það taki deyfilyfið í kringum sjö mínútur að virka og oftast dugi að skjóta einni ör. Þetta sé einfalt að gera.

Hann segir mesta hættuna á Hornströndum að björninn hlaupi út í sjó og drukkni þegar lyfin fari að virka en við slíkar aðstæður reyni menn að snara dýrið úr þyrlunni. Benedikt spyr hins vegar hvaða skynsemi sé í því að koma ísbirni í búr og flytja hann með miklum tilkostnaði til heimaslóða á Austur-Grænlandi til þess eins að láta veiðimenn skjóta hann þar. Þá sé betra að skjóta björninn á Íslandi og draga hann frá veiðikvóta Grænlands. Á austurströnd Grænlands sé veiðikvóti upp á tugi bjarndýra á hverju ári sem atvinnuveiðimenn skjóti.

Benedikt segir að í Manitoba glími menn einnig við ísbjarnavanda á vorin og þar séu dýrin höfð á sérstöku ísbjarnahóteli allt sumarið án matar enda með nægan fituforða eftir veturinn. Þegar Hudson-flóa leggi á ný sé dýrunum hleypt út af hótelinu og þau haldi þá út á ísinn. Þar hafi þetta gengið vel. Á Íslandi þyrftu menn þó að bíða kannski í mörg ár eftir að fá hafís að ströndum til að sleppa þeim út á.