Almannavarnir vara við óveðri á aðfangadag

Almannavarnardeild ríkislögreglustjóra vill vekja athygli á tilkynningu frá Veðurstofu Íslands vegna slæmrar veðurspár fyrir allt land á aðfangadag jóla og einnig hárri sjávarstöðu næstu daga.

Lægð er spáð upp að landinu í nótt. Hún dýpkar hratt og veldur sunnan hvassviðri og rigningu sunnantil snemma morguns en slyddu eða snjókomu til fjalla.

Á Vestfjörðum er spáð norðan hvassviðri og snjókomu fram yfir hádegi.

Lægðin gengur norðaustur yfir land og síðdegis er spáð norðvestan stormi með snjókomu á austurhluta landsins. Vindhraði gæti þar farið upp í 23 til 28 metra á sekúndu og hviður geta farið yfir 40 metra á sekúndu um og eftir kl. 18. annað kvöld.

Landsmönnum er bent á að athuga vel bæði færð, veður og veðurspá áður en þeir leggja í ferðalög á milli landshluta því færð spillist mjög fljótt í veðri sem þessu.

Ljóst er að veður verður slæmt í öllum landshlutum á mismunandi tíma á morgun, og nauðsynlegt að gæta varúðar.

Landhelgisgæslan vill einnig benda á að vegna hárrar sjávarstöðu næstu daga getur stormurinn haft aukin áhrif á sjávarstöðuna þar sem áhlaðandi og stórstreymi koma saman.