Það er bannað að njóta listar í dag

Í dag er bannað að njóta lista, en bandalag íslenskra listamanna (BÍL) stendur fyrir listalausa deginum í dag. Þannig hafa listamenn pakkað styttum í miðborg Reykjavíkur inn í plast svo það sé örugglega ekki hægt að njóta listarinnar.

Markmið listalausa dagsins er að vekja athygli fólks á þýðingu lista og menningar í daglega lífinu.

Það kann því að reynast þrautinni þyngri að fara eftir boðorðunum fimmtán, sem gefin hafa verið út í tilefni dagsins, en það verður gaman að leggja sig fram um að reyna.

Hér fyrir neðan má lesa boðorðin þar sem fólki er meðal annars bannað að hlusta á tónlist, spila tölvuleiki með grafískri mynd og horfa á bíómyndir.

Boðorðin eru:

1. Ekki fara á listasöfn, hönnunarsöfn, gallerí eða minjasöfn sem geyma listaverk.

2. Ekki horfa á myndlistarverk, þar með talin málverk, ljósmyndir, höggmyndir og innsetningar, hvort sem er úti sem inni.

3. Ekki fara á tónleika.

4. Ekki hlusta á tónlist, hvorki af CD, vínil, snældu, stafrænum tónlistarspilurum né snjallsímum (hringitónar meðtaldir).

5. Ekki spila tölvuleik með grafískri mynd.

6. Ekki fara á danssýningu.

7. Ekki lesa skáldsögu, ljóð eða nokkurn annan texta sem talist gæti til fagurbókmennta.

8. Ekki fara í leikhús.

9. Ekki horfa á kvikmynd, hvorki í bíó, af tölvu, í sjónvarpi né hverskonar skjá

10. Ef einhvers konar listaverk birtist í sjónvarpi, t.d. í fréttum eða auglýsingum, ber að loka augunum eða líta undan.

11. Ef tónverk heyrist í sjónvarpi eða útvarpi ber að lækka niður í tækinu.

12. Ekki horfa á byggingar sem eru hannaðar af arkitekt.

13. Ekki horfa á eða ganga um garða sem eru hannaðir af landslagsarkitekt.

14. Ekki horfa á eða ganga í sérhönnuðum fötum eftir fatahönnuð.

15. Ekki gera neitt eða njóta neins sem hægt væri að túlka sem list eða hefur í sér listrænt gildi, þar með talin verk dansara, hönnuða, kvikmyndagerðarmanna, leikara, myndlistar-manna, rithöfunda og tónlistarmanna.