Bretar vara þegna sína við íslensku hvalkjöti

Bresk stjórnvöld vara þegna sína við því að kaupa hvalkjöt á Íslandi. Viðurlög við því að koma með hvalkjöt til Bretlands eru þung sekt og jafnvel fangelsisdómur. Á dögunum gerðu náttúruverndarsamtök könnun á því hvort hægt væri að kaupa hrefnukjöt í verslunum í Leifsstöð og fullyrt var að starfsfólk verslunarinnar hefði gefið þær upplýsingar að óhætt væri að kaupa kjötið og fara með til Bretlands.

Nú hefur breska utanríkisráðuneytið hinsvegar uppfært á heimasíðu sinni ráðleggingar til þeirra sem hyggja á ferðalög til Íslands. Þar er minnt á að þótt hvalkjöt sé selt á Íslandi þá sé það með öllu óheimilt að flytja það inn til Bretlands og annara Evrópulanda. Brot á þessu varða sektum allt að fimm þúsund pundum og jafnvel fangelsisdómi.