Sterkasta kona Íslands haldin um helgina

Keppnin „Sterkasta kona Íslands“ verður haldin í Höprunni klukkan tvö á sunnudaginn kemur. Keppnin er hluti af sýningunni „Icelandic Health and Fitness Expo“

Á meðal keppanda eru Bryndís Ólafsdóttir, sterkasta kona Íslands 1995-1998, Jóhanna Eivindsdóttir, sterkasta kona Íslands 2009 og núverandi titilhafi Þóra Þorsteinsdóttir.

Keppnin er skipulögð af Gemmu Magnússon sem hefur unnið titilinn Sterkasta kona Bretlands fjórum sinnum. Í sumar lenti Gemma í öðru sæti í keppninni Sterkasta kona heims, sem haldin var í Úkraínu, aðeins 8 vikum eftir fæðingu yngri sonar hennar. Hún hefur verið að leiðbeina keppendum í gegnum þrautirnar í Sporthúsinu í Kópavogi síðastliðna tvo mánuði og er virkilega ánægð með þann náttúrulega styrk og hugarfar sem íslenskar konur búa yfir.

„Ég segi það á hverju ári en íslenskar konur hafa bestu krafta genin á plánetunni, það tekur þær svo stuttan tíma til þess að bæta árangur sinn," segir Gemma Magnússon í tilkynningu.

„Keppnin byrjar á drumbalyftu þar sem keppendur geta valið á milli 40 eða 60 kílóa drumba. Síðan er sandpokagangan þar sem keppendur halda á 80 kílóa sandpoka eins langt og þeir komast. Allir keppendur taka þátt í fyrstu tveimur þrautunum en aðeins 8 efstu keppendurnir halda áfram keppni og taka þátt í síðustu þremur þrautunum.

Í fyrstu þraut er byrjað á því að draga 170 kílóa fiskikar yfir 10 metra braut, síðan þurfa keppendur að halda á 10 kílóa ketilbjöllu fyrir framan sig eins lengi og þeir geta. Síðasta þrautin er réttstöðulyfta. Jóhanna Eivinsdóttir er núverandi methafi með 200 kílóa réttstöðulyftu- nú er spurning hvort að einhver keppendanna setur nýtt met í ár,“ segir í tilkynningu.