Alþingi falið að bera ábyrgð á Vaðlaheiðargöngum

Stefnt er að því að Alþingi taki ákvörðun innan tveggja til þriggja vikna um hvort lánsfjárheimild verði veitt til Vaðlaheiðarganga. Nýir arðsemisútreikningar verða kynntir á opnum þingnefndarfundi á mánudag.

Nú hyllir undir ákvörðun um hvort draumur Norðlendinga um rúmlega sjö kílómetra göng undir Vaðlaheiði muni rætast en við það styttist leiðin milli Akureyrar og Húsavíkur um sextán kílómetra. Tilboð liggur fyrir frá verktökum um að skila göngunum tilbúnum fyrir tæpa níu milljarða króna. Þá liggja jafnframt fyrir nýir arðsemisútreikningar sem benda til þess að veggjöld muni greiða upp á kostnaðinn á 25 árum, miðað við gefnar forsendur, meðal annars um tekjur af umferð.

Þar sem slíkir útreikningar eru óvissu háðir og verkefnið umdeilt, ekki síst innan stjórnarflokkanna, vill ríkisstjórnin að það verði Alþingi sem beri hina pólitísku ábyrgð og að ákvörðun verði tekin fyrir opnum tjöldum að undangenginni opinberri umræðu. Í því skyni verður sjónvarpað frá fundi umhverfis- og samgöngunefndar Alþingis fyrir hádegi á mánudag þar sem gögn verða lögð fram og kynnt. Ráðherra vegamála, Ögmundur Jónasson, og fjármálaráðherrann, Steingrímur J. Sigfússon, koma fyrir nefndina, en einnig fulltrúar hlutafélagsins um Vaðlaheiðargöng og fulltrúar Félags íslenskra bifreiðaeigenda, sem lýst hafa efasemdum um verkefnið.

Eftir að þingmenn hafa fengið tækifæri til að kryfja útreikningana er stefnt að því að atkvæðagreiðsla fari fram á Alþingi innan tveggja til þriggja vikna um lánsfjárheimild til Vaðlaheiðarganga á fjáraukalögum. Fáist heimildin samþykkt má búast við að vinna við Vaðlaheiðargöng hefjist innan fárra vikna.