Íslenskir járnkarlar leggja í þrekraunina

Ellefu íslenskir karlar og ein kona keppa í dag í heilum Járnkarli eða Iron Man við Panama Beach í Florida í Bandaríkjunum.

Núna klukkan tólf á hádegi hófu Íslendingarnir tólf keppni. Ironman eða Járnkarl samanstendur af 3,8 kílómetra sundi sem fram fer í mexíkóflóa, 180 km á hjóli og að lokum heilu maraþoni eða 42,2 km hlaupi.

Íslendingarnir hafa margir hverjir æft undir viðburðinn í heilt ár og var góð stemmning í hópnum þegar fréttastofa náði tali af þeim á leið á keppnisstað í morgun.

Einn Íslendinganna, Vignir Þór Sverrisson, stefnir að því setja nýtt íslandsmet í Ironman í dag en núgildandi metið, 9 klst og tæpar 25 mín á Steinn Jóhannson frá því í Iron Man í Köln í fyrra. Hægt er að fylgjast með keppendum á heimasíðunni ironmanlive.com.