Þór lagður af stað til björgunar

Ennþá er unnið að því að koma upp dráttartaug milli togskipsins Hoffells og flutningaskipsins Ölmu. Búist er við því að þær tilraunir beri árangur á næstu stundum. Mikið hvassviðri er á svæðinu, og meðan tauginni hefur ekki verið komið fyrir rekur flutningaskipið stjórlaust utan við landið.

Varðskipið Þór hefur verið sent af stað til að taka þátt í björgunaraðgerðum. Siglingin er hins vegar nokkuð löng og ekki er gert ráð fyrir því að Þór komi á svæðið fyrr en klukkan sex í fyrramálið.

Flutningaskipið Alma lenti í vandræðu úti fyrir Hornafirði í nótt þegar stýribúnaður þess bilaði. Í kjölfarið barst Landhelgisgæslunni aðstoðarbeiðni frá skipinu og voru umfangsmiklar björgunaraðgerðir settar af stað.

Laust fyrir hádegi í dag slitnaði dráttartaug á milli Ölmu og togskipsins Hoffells. Síðan hefur verið unnið að því að koma tauginni aftur fyrir. Í fyrstu voru nokkrir samskiptaörðugleikar milli björgunarmanna og skipsverja, sem allir eru af erlendu bergi brotnir. Í kjölfarið var túlkur kallaður á skipsfjöl og síðan hafa samskipti gengið bærilega.

Mikill vindur er á svæðinu, en til allrar hamingju stendur vindáttin til norðausturs svo að skipið rekur í átt frá landi. Því er engin aðkallandi hætta á ferðum.