Stefnir í að Þorláksbúð verði reist

Kirkjuráð mun ekki standa því í vegi að Þorláksbúð í Skálholti verði endurgerð. Þetta var ákveðið á fundi ráðsins á miðvikudaginn var.

Þorláksbúð á að vera eftirlíking af hinni fornu búð, reist á tóftum hennar og skal standa nærri Skálholtskirkju.

Miklar deilur hafa verið um byggingu búðarinnar að undanförnu, enda vilja menn meina að hún muni skyggja á Skálholtsdómkirkjuna.

Nú liggur hins vegar fyrir að byggingarleyfi verður gefið út, enda ákvað ráðið með atkvæðagreiðslu að gera ekki athugasemdir við bygginguna. Þess er vert að geta að biskup sat hjá við atkvæðagreiðsluna.

Næstu skref verða að sögn framkvæmdastjóra ráðsins, Guðmundar Þórs Guðmundssonar, að reisa húsið og telur hann það verði fremur fljótgert.