Herramenn þakklátir fyrir fjárstuðning

Þrír framtakssamir piltar stefna að því að gefa út 64 blaðsíðna leiðarvísi fyrir herramenn fyrir jólin. Útgáfuna fjármagna þeir á frumlegan hátt sem þeir kalla hópfjármögnun. Á tveimur vikum hafa safnast 250 þúsund krónur með framlögum almennings.

Bókin mun bera heitið Litla herramennskukverið. Með henni vill Kristinn Árni Lár Hróbjartsson, sem skrifar bókina, berja inn í samlanda sína fágaða og „séntilmannlega" framkomu.

„Herramaðurinn veit hvernig hann á að haga sér í öllum aðstæðum. Hversu undarlegar sem aðstæður geta orðið mun herramaður alltaf koma vel fyrir," segir Kristinn, og þessa listgrein mun hann útskýra í kverinu.

Hópfjármögnun virkar þannig að fólk getur gefið smáar upphæðir á netinu til stuðnins verkefninu. Fyrir stuðninginn fá styrktaraðilar gjöf, hverrar verðmæti ræðst að upphæð styrkjanna. Kristinn segir styrkina koma úr öllum áttum.

„Við sjáum hverjir eru að styrkja okkur. Maður hefði kannski ímyndað sér að þetta væru allt ættingjar eða vinir, en svo er ekki. Við þekkjum auðvitað einhverja, en svo er þetta mikið til bara ókunnugt fólk sem hefur séð þetta í fréttum."

Bókaútgáfa er dýrt fyrirtæki og því sáu félagarnir ekki fram á að geta fjármagnað þetta verkefni nema á þennan áhugaverða hátt. Hingað til hefur verkefnið gengið framar vonum, og stefnir í að útgáfan takist.

„Við erum að vonum mjög þakklátir fyrir þessar viðtökur og gaman að sjá hversu opnir Íslendingar virðast vera fyrir hópfjármögnun," segir Kristinn.

Þegar hefur safnast upp í helming þeirrar upphæðar sem þörf er fyrir útgáfuna. Ef hins vegar ekki safnast nægjanlegur peningur í tæka tíð verður hætt við útgáfuna og styrktaraðilar fá endurgreitt.

Fyrir þá sem vilja kynna sér verkefnið bendum við á vefsíðu þess: http://herramennska.pozible.com