Truflanir á fjarskiptasambandi á Norð-Austurlandi

Bilun kom upp á stofnkerfi Mílu á Norð-Austurlandi. Undirbúningur að viðgerð er hafinn. Ekki er enn vitað nákvæmlega í hverju bilunin felst, en bilanagreining stendur yfir.

Bilunin mun bitna á fjarskiptasambandi á svæðinu, jafnt farsímum sem heimasímum, enda selur Míla þjónustu sína til fyrirtækja eins og Vodafone og Símans, sem selja svo þjónustuna áfram.

Truflanirnar munu að öllum líkindum helst bitna á íbúum Kópaskers og Raufarhafnar. Mikið óveður er nú þar á svæðinu og talið er að það hafi valdið biluninni.

Sigurrós Jónsdóttir, upplýsingafulltrúi Mílu, telur að þegar tekist hefur að greina bilunina muni taka nokkurn tíma að senda viðgerðarmenn á staðinn, en þegar þangað verði komið verði þeir fljótir að lagfæra villuna.