Kæru kassastráksins í Hagkaupum vísað frá

Kærunefnd jafnréttismála hefur ákveðið að vísa kæru Halls Reynissonar frá. Forsaga málsins er sú að VR hratt af stað átaki sem ætlað var að vekja athygli á launamuni kynjanna. Nokkrar verslanir tóku sig til og veittu konum 10 prósent afslátt yfir eina helgi. Hallur, sem starfar á afgreiðslukassa í Hagkaupum á Akureyri, ákvað að kæra fyrirtækin og VR að auki til kærunefndar jafnréttismála.

Taldi Hallur að með því að veita konum sérstakan afslátt væri verið að brjóta gegn lögum um jafna stöðu og jafnan rétt kvenna og karla. Niðurstaða kærunefndarinnar var hinsvegar sú að Hallur hefði ekki „einstaklingsbundna hagsmuni“ af úrlausn málsins og var málinu því vísað frá.

Í úrskurðinum segir að skilyrði til kæru til nefndarinnar sé það að kærandi hafi einstaklingbundinna og lögvarða hagsmuna að gæta af því að úr málinu leysist. „Slíku er ekki borið við af hálfu kæranda heldur á því byggt að hann geti ekki fellt sig við framgöngu kærðu, þar sem hann sé jafnréttissinni auk þess sem hann dregur í efa að raunverulegum kynbundnum launamun sé til að dreifa,“ segir í úrskurðinum.

Hallur hafi því ekki byggt mál sitt á því að hann ætti persónulega hagsmuni umfram aðra einstaklinga af úrlausn málsins. „Þar sem á það hugtaksskilyrði skortir verður því að vísa máli þessu frá kærunefnd.“