Björgunarsveitir stóðu í ströngu í nótt

Björgunarsveitir voru kallaðar út víða á svæðinu frá Suðurnesjujm og vestur á Snæfellsnes í gærkvöldi og í nótt til að hefta fok, en hvergi virðist hafa orðið alvarlegt tjón og ekki er vitað um neinar slysfarir.

Lausamunir og jafnvel heilu skúrarnir fóru að fjúka og þakplötur losnuðu sumstaðar af húsum. Þá fauk jólageitin við IKEA út í veður og vind. 

Mikil rigning fylgdi hvassviðrinu, einkum framan af. Þrumur og eldingar voru líka um tíma á Suðurlandi. Hinsvegar var sunnan hnúkaþeyr og þurrviðri fyrir noðran og fór hitinn upp í 14 stig á Akureyri í nótt og hann fór hátt í það á Ísafirði líka.

Víða hefur vöxtur hlaupið í ár og læki, samkvæmt mælingakorti Veðurstofunnar. Á fjallvegum var hitinn víða 6 til 8 gráður. Óvenju lítil umferð var á þjóðvegum vestan og norðvestanlands í nótt, samkvæmt talningastöðvum Vegagerðarinnar.